Zyeelelo Zyaampandamunsaka Munzila Imvwisisika (Simplified Version of the Declaration of Rights in Tonga)

Niinzi Zyeelelo Zyaampandamunsaka?


Ikkata Lyamulawu wanyika nguumulawu mupati munyika uupandulula mbiiyelede kulelwa nyika. Zyeelelo Zyaampandamunsaka (Declaration of Rights) zijanika muChaandano ChaNe muKkata Lyamulawu wanyika yesu. Chaandano eechi chipandulula zyeelelo antoomwe angwangunuko bantu nzibeelede kujana mubuumi bwabo kakutakwe uubabinda.

Zyeelelo zyabantu ningwangunuko nzibeelede kubaazyo nkaambo kakuti mbantu. Zyeelelo zijanika muZyeelelo Zyaampandamunsaka nzyeelelo zyakasindaminwa muKkata Lyamulawu wanyika zyeelede kukwabililwa amulawu chiindi choonse. Milawu iinyansya zyeelelo zijanika muZyeelelo Zyaampandamunsaka taakwe niinga ilapangwa pe adomane kwazuminanwa kuti ikkama lyazyeelelo zyaampandamunsaka lwalyo lizumizye. Fumbwa mulawu uunyansya akukazyania aazyeelelo zijanika muzyeelelo zyaampandamunsaka, ooyo mulawu weelede kubambululwa nkaambo tuuzumizigwi pe. Kuti zyeelelo eezi zijanika muzyeelelo zyampandamunsaka zyatyolwa, sikutyolelwa zyeelelo ooyo ulazumizigwa kuya kunkuta akakumbile kuliigwa. Ulakonzya kuya kunkuta mpati yaajulu iitegwa ni Constitutional Court kaambo kakwe kakalangwelangwe kabotu.

Izyeelelo Zyaampandamunsaka zijanika muKkata Lyamulawu wesu pya lijisi zyeelelo zisiyenesiyene. Kuli zyeelelo zyameendelezyo aanyika, zyabuvubi antoomwe azyabukkale bwabantu. Kabiyo zyeelelo zyazilengwa zituzyungulukide zilajanika muZyeelelo Zyaampandamunsaka. Zyeelelo Zyameendelezyo Eenyika (Civil and Political rights) nzyeelelo nzyalaazyo muntu nkaambo kakuti wakazyalilwa antoomwe akukomenena munyika eeyo. Zyeelelo eezi zikwabilila muntu kuti atajatwi buzike afulumende wakwe, tumwi tubunga antoomwe abamwi bantu bajanika munyika. Zyeelelo eezi kabiyo zizumizya muntu kuti anjile mumabambe aakweendelezegwa kwanyika yakwe kakutakwe uumukasya naakuti kumusaluula.. Mukozyanisyo wazyeelelo zili boobu nzeezi: cheelelo chakupona, cheelelo chakwaangunuka, cheelelo chakutasonsegwa awumwi muntu, ngwangunuko yakwaambuula mbayanda muntu, yakuswaanana abamwi bantu mboyanda/tubunga ntoyanda, angwangunuko yakunjila mumabambe azyameendelezyo eenyika. Zyeelelo zili boobu zitegwa nzyeelelo zyalutaanzi (first generation rights) nkaambo nzizyeelelo zyakataanguna kulemekwa aansi lyoonse mbulizulwa.

Zyeelelo Zyabuvubi, Bukkale aTunsiyansiya twabantu (Economic, social and cultural rights) zijata zyeelelo zilaatala akusimatizya antoomwe akusumpula maponeno aamuntu mubukkale bwakwe. Zyeelelo eezi zili mbuuli cheelelo chakuti muntu woonse weelede kubeleka mulimu uumupa mali/mpindu, cheelelo chakujana chakulya, cheelelo chakujana chiyusilo, cheelelo chakujana lwiiyo, cheelelo chakujana maponeno maboutu, cheelelo chakwiiya mulaka wako. Zyeelelo eezi zitegwa nzyeelelo zyachibili (second generation rights) nkaambo zyakazoolemekwa nikwakazwa aakulemekwa zyeelelo zyaatala ameendelezyo eenyika. Zyeelelo Zyakukamantana azyatubunga (Solidarity and group rights) azilazyo zitegwa nzyeelelo zyachitatu (third generation rights). Eezi zyeelelo nzeezi ziili mbuuli cheelelo chakujana lusumpuko, cheelelo chakupona muluumuno, cheelelo chakukkala mubusena butakwe tombe.

Zintu zili mbuuli zyeelelo zyabantu, milimu yeelede kuchitwa abantu antoomwe amilimu yeelede kuchitilwa chisi, zintu ziboneka kazikamantene kabiyo zyeendela aamwi. Muntu woonse ulamulandu wakulemeka zyeelelo zyabamwi antoomwe akuba aamukuli wakutobela akulemeka zyaambwa aKkata Lyamulawu wanyika yaZimbabwe ayimwi milawu iijanika munyika. Nkinkaako zimwi zyeelelo zijanika muZyeelelo Zyaampandamunsaka zilakonzya kutazuzikizigwa muchiindi chimwi kuchitila kuti buumi bwaluundu bube kabotu. Kabiyo eezi zichitilwa kuti zyeelelo zyabamwi bantu tazityolwi.

Tags: 

Download File: